ਜਲੰਧਰ ’ਚ ਦੁਕਾਨਦਾਰ ਦੇ ਗ੍ਰਾਹਕ ਵਿਚਾਲੇ ਖੜਕੀ/ ਨਾਨ ਦੀ ਕੀਮਤ ਨੂੰ ਲੈ ਕੇ ਝਗੜਾ, ਵੀਡੀਓ ਵਾਇਰਲ/ ਥਾਣੇ ਪਹੁੰਚਿਆ ਮਾਮਲਾ, ਪੁਲਿਸ ਕਰ ਰਹੀ ਜਾਂਚ

ਜਲੰਧਰ ਸ਼ਹਿਰ ਦੇ ਬੱਸ ਸਟੈਂਡ ਇਲਾਕੇ ਵਿਚ ਉਸ ਵਾਲੇ ਵੱਡਾ ਹੰਗਾਮਾ ਹੋ ਗਿਆ ਜਦੋਂ ਇੱਥੇ ਸਥਿਤ ਇੱਕ ਰੈਸਟੋਰੈਂਟ ਵਿੱਚ ਨਾਨ ਦੀ ਕੀਮਤ ਨੂੰ ਲੈ ਕੇ ਇੱਕ ਗਾਹਕ ਅਤੇ ਰੈਸਟੋਰੈਂਟ ਮਾਲਕ ਆਪਸ ਵਿਚ ਉਲਝ ਗਏ। ਪਹਿਲਾਂ ਦੋਵਾਂ ਵਿਚਾਲੇ ਬਹਿਸ਼ ਹੋਈ ਅਤੇ ਫਿਰ ਗੱਲ ਹੱਥੋਪਾਈ ਤੇ ਮਾਰਕੁੱਟ ਵਿਚ ਬਦਲ ਗਈ। ਘਟਨਾ ਦੀ ਵੀਡੀਓ ਸਾਹਮਣੇ ਆਈ ਹੈ, ਜਿਸ ਵਿਚ ਦੋਵੇਂ ਧਿਰਾਂ ਇੱਕ ਦੂਜੇ ਨੂੰ ਲੱਤਾਂ, ਮੁੱਕੇ ਅਤੇ ਥੱਪੜ ਮਾਰਦੀਆਂ ਦਿਖਾਈ ਦੇ ਰਹੀਆਂ ਹਨ। ਬਾਅਦ ਵਿਚ ਮਾਮਲਾ ਪੁਲਿਸ ਕੋਲ ਪਹੁੰਚ ਗਿਆ। ਪੁਲਿਸ ਮਾਮਲੇ ਦੀ ਜਾਂਚ ਕਰ ਰਹੀ ਹੈ।

ਜਾਣਕਾਰੀ ਅਨੁਸਾਰ ਊਨਾ ਦਾ ਇੱਕ ਯਾਤਰੀ ਅੰਮ੍ਰਿਤਸਰ ਤੋਂ ਊਨਾ ਜਾ ਰਿਹਾ ਸੀ। ਉਹ ਬੱਸ ਸਟੈਂਡ ‘ਤੇ ਸਥਿਤ ਇੱਕ ਰੈਸਟੋਰੈਂਟ ਵਿੱਚ ਕੁੱਝ ਖਾਣ ਲਈ ਰੁਕਿਆ ਅਤੇ ਦੋ ਨਾਨ ਮੰਗਵਾਏ। ਨਾਨ ਖਾਣ ਤੋਂ ਬਾਅਦ ਜਦੋਂ ਉਸਨੇ ਬਿੱਲ ਮੰਗਿਆ ਤਾਂ ਰੈਸਟੋਰੈਂਟ ਮਾਲਕ ਨੇ ਨਾਨ ਦੀ ਇੱਕ ਪਲੇਟ ਲਈ 180 ਰੁਪਏ ਦਾ ਹਵਾਲਾ ਦਿੱਤਾ। ਗਾਹਕ ਨੇ ਵੱਧ ਕੀਮਤ ਦਾ ਵਿਰੋਧ ਕੀਤਾ, ਜਿਸ ਕਾਰਨ ਬਹਿਸ ਹੋ ਗਈ।

ਪ੍ਰਤੱਖਦਰਸ਼ੀਆਂ ਮੁਤਾਬਕ ਝਗੜਾ ਵਧਣ ‘ਤੇ ਦੋਵੇਂ ਧਿਰਾਂ ਸੜਕ ‘ਤੇ ਉਤਰ ਆਈਆਂ ਅਤੇ ਹੱਥੋਪਾਈ ਹੋ ਗਈ। ਘਟਨਾ ਵਿੱਚ ਗਾਹਕ ਦੇ ਸਿਰ ਵਿੱਚ ਸੱਟ ਲੱਗੀ। ਇਸ ਤੋਂ ਬਾਅਦ ਦੋਵੇਂ ਧਿਰਾਂ ਸ਼ਿਕਾਇਤ ਲੈ ਕੇ ਪੁਲਿਸ ਸਟੇਸ਼ਨ ਪਹੁੰਚੀਆਂ। ਢਾਬਾ ਸੰਚਾਲਕ ਹਰਜਿੰਦਰ ਸਿੰਘ ਨੇ ਕਿਹਾ ਕਿ ਉਸਨੇ ਗਾਹਕ ਨੂੰ ਦੋ ਨਾਨ ਦਿੱਤੇ ਸਨ ਅਤੇ ਜਦੋਂ ਉਨ੍ਹਾਂ ਤੋਂ ਪੈਸੇ ਮੰਗੇ ਗਏ ਤਾਂ ਉਹ ਬਹਿਸ ਕਰਨ ਲੱਗ ਪਿਆ। ਉਨ੍ਹਾਂ ਦੇ ਅਨੁਸਾਰ ਇੱਕ ਨਾਨ ਦੀ ਕੀਮਤ 90 ਰੁਪਏ ਹੈ।

ਢਾਬਾ ਸੰਚਾਲਕ ਨੇ ਗਾਹਕ ‘ਤੇ ਨਸ਼ੇ ਦੀ ਹਾਲਤ ਵਿੱਚ ਹੋਣ ਅਤੇ ਉਸਦੇ ਕੱਪੜੇ ਪਾੜਨ ਦਾ ਦੋਸ਼ ਲਗਾਇਆ। ਹਾਲਾਂਕਿ, ਉਹ ਹੱਥੋਪਾਈ ਸੰਬੰਧੀ ਸਵਾਲ ਦਾ ਸਪੱਸ਼ਟ ਜਵਾਬ ਨਹੀਂ ਦੇ ਸਕਿਆ।  ਇਸ ਦੌਰਾਨ ਢਾਬੇ ‘ਤੇ ਰੇਟ ਲਿਸਟ ਨਾ ਹੋਣ ਬਾਰੇ ਪੁੱਛੇ ਜਾਣ ‘ਤੇ ਉਸ ਨੇ ਕਿਹਾ ਕਿ ਨੇੜਲੇ ਹੋਰ ਢਾਬਿਆਂ ‘ਤੇ ਵੀ ਰੇਟ ਲਿਸਟਾਂ ਨਹੀਂ ਲਗਾਈਆਂ ਗਈਆਂ ਸਨ। ਪੁਲਿਸ ਅਧਿਕਾਰੀਆਂ ਨੇ ਕਿਹਾ ਕਿ ਦੋਵਾਂ ਧਿਰਾਂ ਦੇ ਬਿਆਨ ਦਰਜ ਕੀਤੇ ਜਾ ਰਹੇ ਹਨ ਅਤੇ ਮਾਮਲੇ ਦੀ ਜਾਂਚ ਤੋਂ ਬਾਅਦ ਕਾਨੂੰਨ ਅਨੁਸਾਰ ਅਗਲੀ ਕਾਰਵਾਈ ਕੀਤੀ ਜਾਵੇਗੀ।