ਚੰਡੀਗੜ੍ਹ ’ਚ ਨਕਲੀ ਪਨੀਰ ਵੇਚੇ ਜਾਣ ਦਾ ਪਰਦਾਫਾਸ਼/ ਬਾਪੂ ਧਾਮ ਕਾਲੋਨੀ ’ਚੋਂ 450 ਕਿਲੋਗਰਾਮ ਪਨੀਰ ਬਰਾਮਦ/ ਘਰ ਅੰਦਰ ਚੱਲ ਰਹੀ ਦੁਕਾਨ ਅੰਦਰ ਰੱਖਿਆ ਸੀ ਨਕਲੀ ਪਨੀਰ

ਚੰਡੀਗੜ੍ਹ ਦੀ ਬਾਪੂ ਧਾਮ ਕਾਲੋਨੀ ਵਿਚ ਨਕਲੀ ਪਨੀਰ ਵੇਚੇ ਜਾਣ ਦੀ ਖਬਰ ਸਾਹਮਣੇ ਆਈ ਐ। ਫੂਡ ਸੇਫਟੀ ਤੇ ਸਿਹਤ ਵਿਭਾਗ ਦੀ ਟੀਮ ਨੇ ਛਾਪੇਮਾਰੀ ਕਰ ਕੇ ਨਕਲੀ ਪਨੀਰ ਦਾ ਜ਼ਖੀਰਾ ਬਰਾਮਦ ਕੀਤਾ ਐ। ਇਹ ਪਨੀਰ ਅੱਗੇ ਸਪਲਾਈ ਕੀਤਾ ਜਾਣਾ ਸੀ। ਛਾਪੇਮਾਰੀ ਦੌਰਾਨ 450 ਕਿਲੋ ਪਨੀਰ ਮਿਲਿਆ ਐ। ਇਹ ਪਨੀਰ ਦੁਕਾਨ ਦੇ ਬਾਹਰ ਖੜ੍ਹੀ ਪਿਕਅੱਪ ਗੱਡਟੀ ਵਿਚ ਪਿਆ ਸੀ। ਟੀਮ ਨੇ ਦੁਕਾਨ ਵਿਚੋਂ ਦੇਸੀ ਘਿਓ ਅਤੇ ਦਹੀ ਦੇ ਨਮੂਨੇ ਲੈ ਕੇ ਲੈਬਾਰਟਰੀ ਜਾਂਚ ਲਈ ਭੇਜ ਕੇ ਅਗਲੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਐ।  ਜਾਣਕਾਰੀ ਅਨੁਸਾਰ ਵਿਭਾਗ ਨੂੰ ਇੱਥੇ ਸ਼ੱਕੀ ਪਨੀਰ ਵੇਚੇ ਜਾਣ ਦੀ ਸੂਚਨਾ ਮਿਲੀ, ਜਿਸ ਤੋਂ ਬਾਅਦ ਕਾਰਵਾਈ ਕਰਦਿਆਂ ਟੀਮ ਨੇ ਇਹ ਪਨੀਰ ਬਰਾਮਦ ਕੀਤਾ ਐ। ਫੂਡ ਸੇਫਟੀ ਅਫਸਰ ਨੇ ਦੁਕਾਨ ਦੇ ਨਾਲ-ਨਾਲ ਪਿਕਅੱਪ ਜੀਪ ਤੋਂ ਪਨੀਰ ਦੇ ਨਮੂਨੇ ਜ਼ਬਤ ਕੀਤੇ। ਇਸ ਦੇ ਨਾਲ ਹੀ ਦੇਸੀ ਘਿਓ ਅਤੇ ਦਹੀ ਦੇ ਨਮੂਨੇ ਵੀ ਲਏ ਗਏ। ਨਮੂਨਿਆਂ ਦਾ ਐੱਫਐੱਸਐੱਸਏਆਈ ਦੁਆਰਾ ਅਧਿਕਾਰਤ ਫੂਡ ਐਨਾਲਿਸਟ ਲੈਬਾਰਟਰੀ ਦੁਆਰਾ ਸਮੇਂ ਸਿਰ ਵਿਸ਼ਲੇਸ਼ਣ ਕੀਤਾ ਜਾਵੇਗਾ ਅਤੇ ਜੇਕਰ ਇਹ ਮਾਪਦੰਡਾਂ ਦੇ ਅਨੁਸਾਰ ਨਹੀਂ ਪਾਏ ਜਾਂਦੇ ਤਾਂ ਫੂਡ ਬਿਜ਼ਨਸ ਆਪਰੇਟਰ ਵਿਰੁੱਧ ਢੁਕਵੀਂ ਕਾਰਵਾਈ ਕੀਤੀ ਜਾਵੇਗੀ। ਅਹਾਤੇ ਵਿੱਚੋਂ ਪਨੀਰ ਦਾ ਸਾਰਾ ਸਟਾਕ ਜ਼ਬਤ ਕਰ ਲਿਆ ਗਿਆ ਹੈ ਅਤੇ ਫੂਡ ਸੇਫਟੀ ਐਂਡ ਸਟੈਂਡਰਡਜ਼ ਐਕਟ, 2006 ਦੇ ਅਧੀਨ ਪ੍ਰਾਵਧਾਨਾਂ ਅਨੁਸਾਰ ਫੂਡ ਬਿਜ਼ਨਸ ਆਪਰੇਟਰ ਦੀ ਹਿਰਾਸਤ ਵਿੱਚ ਰੱਖਿਆ ਗਿਆ ਹੈ। ਫੂਡ ਸੇਫਟੀ ਐਂਡ ਸਟੈਂਡਰਡਜ਼ ਐਕਟ, 2006 ਦੀ ਧਾਰਾ 63 ਤਹਿਤ ਫੂਡ ਬਿਜ਼ਨਸ ਆਪਰੇਟਰ ਯਾਨੀ ਦੁਕਾਨਦਾਰ ਅਤੇ ਵਾਹਨ ਆਪਰੇਟਰ ਦੋਵਾਂ ਨੂੰ ਜਨਤਕ ਵਿਕਰੀ ਅਤੇ ਮਨੁੱਖੀ ਖਪਤ ਲਈ ਲਾਇਸੈਂਸ ਤੋਂ ਬਿਨਾਂ ਖਾਣ-ਪੀਣ ਦੀਆਂ ਚੀਜ਼ਾਂ ਵੇਚਣ ਲਈ ਦੋ ਚਲਾਨ ਕੱਟੇ ਗਏ। ਵਿਭਾਗ ਵੱਲੋਂ ਸਾਰੇ ਨਿਵਾਸੀਆਂ/ਖਪਤਕਾਰਾਂ ਨੂੰ ਅਪੀਲ ਕੀਤੀ ਗਈ ਕਿ ਉਹ ਬਾਜ਼ਾਰ ਤੋਂ ਕੋਈ ਵੀ ਖਾਣ-ਪੀਣ ਦੀਆਂ ਚੀਜ਼ਾਂ ਖਰੀਦਦੇ ਸਮੇਂ ਸਾਵਧਾਨੀ ਵਰਤਣ। ਇਹ ਯਕੀਨੀ ਬਣਾਉਣਾ ਚਾਹੀਦਾ ਹੈ ਕਿ ਉਹ ਜੋ ਖਾਣ-ਪੀਣ ਦੀਆਂ ਚੀਜ਼ਾਂ ਖਰੀਦਦੇ ਹਨ ਉਹ ਸਿਰਫ਼ ਲਾਇਸੰਸਸ਼ੁਦਾ ਦੁਕਾਨਾਂ ਤੋਂ ਹੀ ਹੋਣ ਜੋ ਪੂਰੀ ਸਫਾਈ ਦਾ ਧਿਆਨ ਰੱਖਦੇ ਹਨ ਅਤੇ ਗੁਣਵੱਤਾ ਵਾਲੇ ਉਤਪਾਦਾਂ ਦੀ ਵਰਤੋਂ ਕਰਦੇ ਹਨ ਤਾਂ ਜੋ ਉਨ੍ਹਾਂ ਦੀ ਸਿਹਤ ਨੂੰ ਕੋਈ ਨੁਕਸਾਨ ਨਾ ਹੋਵੇ। ਜੇਕਰ ਕੋਈ ਖਪਤਕਾਰ ਕੁਝ ਵੀ ਅਸਾਧਾਰਨ ਦੇਖਦਾ ਹੈ, ਤਾਂ ਉਹ ਮਾਮਲੇ ਦੀ ਰਿਪੋਰਟ ਫੂਡ ਸੇਫਟੀ ਐਂਡ ਸਟੈਂਡਰਡਜ਼ ਵਿਭਾਗ, ਡਾਇਰੈਕਟਰ ਹੈਲਥ ਸਰਵਿਸਿਜ਼, ਸਰਕਾਰੀ ਮਲਟੀ ਸਪੈਸ਼ਲਿਟੀ ਹਸਪਤਾਲ, ਸੈਕਟਰ 16, ਚੰਡੀਗੜ੍ਹ ਨੂੰ ਕਰ ਸਕਦਾ ਹੈ।