ਬਠਿੰਡਾ ’ਚ ਗਣਪਤੀ ਵਿਸਰਜਨ ਦੌਰਾਨ ਵੱਡਾ ਹਾਦਸਾ/ ਸਰਹਿੰਦ ਨਹਿਰ ’ਚ ਡੁੱਬੇ ਦੋ ਬੱਚੇ/ ਬਚਾਅ ਟੀਮਾਂ ਵੱਲੋਂ ਭਾਲ ਜਾਰੀ

ਬਠਿੰਡਾ ਵਿਚ ਗਣੇਸ਼ ਵਿਸਰਜਨ ਦੌਰਾਨ ਉਸ ਵੇਲੇ ਵੱਡਾ ਹਾਦਸਾ ਵਾਪਰ ਗਿਆ ਜਦੋਂ ਇੱਥੇ ਸਰਹਿੰਦ ਨਹਿਰ ਵਿੱਚ ਦੋ ਬੱਚੇ ਡੁੱਬ ਗਏ। ਲਾਪਤਾ ਬੱਚਿਆਂ ਦੀ ਪਛਾਣ 11 ਸਾਲਾ ਰਿਸ਼ੂ ਅਤੇ ਉਸਦੀ 6 ਸਾਲਾ ਭੈਣ ਅੰਜਨਾ ਵਜੋਂ ਹੋਈ ਹੈ, ਜੋ ਕਿ ਜੋਗੀ ਨਗਰ ਟਿੱਬਾ ਦੇ ਰਹਿਣ ਵਾਲੇ ਹਨ। ਘਟਨਾ ਦੀ ਸੂਚਨਾ ਮਿਲਣ ਬਾਅਦ ਮੌਕੇ ਤੇ ਪਹੁੰਚੀਆਂ ਬਚਾਅ ਟੀਮਾਂ ਨੇ ਬੱਚਿਆਂ ਦੀ ਭਾਲ ਸ਼ੁਰੂ ਕਰ ਦਿੱਤੀ ਹੈ। ਪੁਲਿਸ ਅਨੁਸਾਰ ਕੰਟਰੋਲ ਰੂਮ ਤੋਂ ਸੂਚਨਾ ਮਿਲਣ ਤੋਂ ਬਾਅਦ ਇੱਕ ਪੁਲਿਸ ਟੀਮ ਅਤੇ ਐਸਐਚਓ ਮੌਕੇ ‘ਤੇ ਪਹੁੰਚੇ। ਰਾਸ਼ਟਰੀ ਆਫ਼ਤ ਪ੍ਰਤੀਕਿਰਿਆ ਬਲ (ਐਨਡੀਆਰਐਫ) ਨੂੰ ਵੀ ਸੂਚਿਤ ਕੀਤਾ ਗਿਆ, ਅਤੇ ਬਚਾਅ ਟੀਮਾਂ ਬਚਾਅ ਕਿਸ਼ਤੀਆਂ ਅਤੇ ਉਪਕਰਣਾਂ ਨਾਲ ਖੋਜ ਵਿੱਚ ਸ਼ਾਮਲ ਹੋਈਆਂ।

ਨੌਜਵਾਨ ਵੈਲਫੇਅਰ ਸੋਸਾਇਟੀ ਦੇ ਮੈਂਬਰ ਸੁਮਿਤ ਮਹੇਸ਼ਵਰੀ ਦੇ ਅਨੁਸਾਰ ਸੰਸਥਾ ਨੂੰ ਸ਼ਾਮ 6 ਵਜੇ ਦੇ ਕਰੀਬ ਉਨ੍ਹਾਂ ਦੀ ਹੈਲਪਲਾਈਨ ‘ਤੇ ਇੱਕ ਕਾਲ ਆਈ, ਜਿਸ ਵਿੱਚ ਕਿਹਾ ਗਿਆ ਸੀ ਕਿ ਅਰਜੁਨ ਨਗਰ ਤੋਂ ਆਏ ਤਿੰਨ ਤੋਂ ਚਾਰ ਬੱਚਿਆਂ ਵਿੱਚੋਂ ਦੋ ਨਹਿਰ ਵਿੱਚ ਡਿੱਗ ਗਏ ਹਨ। ਸੰਸਥਾ ਦੀਆਂ ਟੀਮਾਂ ਬਠਿੰਡਾ ਤੋਂ ਝੁੰਬਾ ਅਤੇ ਝੁੱਗਾ ਖੁਰਦ ਝਾਲੋਂ ਤੱਕ ਖੋਜ ਕਰ ਰਹੀਆਂ ਹਨ। ਅਧਿਕਾਰੀਆਂ ਅਨੁਸਾਰ ਰਾਤ ਦਾ ਹਨੇਰਾ, ਰੌਸ਼ਨੀ ਦੀ ਘਾਟ ਅਤੇ ਨਹਿਰ ਦਾ ਤੇਜ਼ ਵਹਾਅ ਖੋਜ ਕਾਰਜ ਵਿੱਚ ਰੁਕਾਵਟ ਪਾ ਰਿਹਾ ਹੈ। ਪੁਲਿਸ ਪ੍ਰਸ਼ਾਸਨ ਨੇ ਸਿਵਲ ਪ੍ਰਸ਼ਾਸਨ ਨੂੰ ਨਹਿਰ ਦੇ ਪਿੱਛੇ ਤੋਂ ਪਾਣੀ ਦੇ ਵਹਾਅ ਨੂੰ ਰੋਕਣ ਦੀ ਵੀ ਬੇਨਤੀ ਕੀਤੀ ਹੈ।

ਜਾਣਕਾਰੀ ਅਨੁਸਾਰ ਕੁੱਝ ਪਰਵਾਸੀ ਸ਼੍ਰੀ ਗਣੇਸ਼ ਜੀ ਦੀ ਮੂਰਤੀ ਵਿਸਰਜਨ ਕਰਨ ਆਏ ਸਨ, ਜਿਸ ਦੌਰਾਨ ਮੂਰਤੀ ਵਿਸਰਜਨ ਵੇਖਣ ਲਈ ਬੱਚੇ ਵੀ ਹਾਜ਼ਰ ਸਨ। ਇਸ ਦੌਰਾਨ ਜਦੋਂ ਮੂਰਤੀ ਵਿਸਰਜਨ ਕੀਤਾ ਜਾ ਰਿਹਾ ਸੀ ਤਾਂ ਦੋ ਬੱਚੇ ਪਾਣੀ ਡਿੱਗ ਗਏ ਅਤੇ ਡੁੱਬ ਗਏ। ਦੱਸਿਆ ਜਾ ਰਿਹਾ ਹੈ ਕਿ ਦੋਵੇਂ ਬੱਚੇ ਇੱਕ-ਦੂਜੇ ਨੂੰ ਡਿੱਗਣ ਤੋਂ ਬਚਾਉਣ ਦੀ ਕੋਸ਼ਿਸ਼ ਕਰ ਰਹੇ ਸਨ। ਦੂਜੇ ਪਾਸੇ ਪਰਿਵਾਰ ਦੇ ਲੋਕਾਂ ਦਾ ਕਹਿਣਾ ਹੈ ਕਿ ਸਾਡੇ ਬੱਚੇ ਵਿਸਰਜਨ ਦੇਖਣ ਆਏ ਸਨ ਅਤੇ ਇੱਕ-ਦੂਸਰੇ ਨੂੰ ਬਚਾਉਂਦੇ ਹੋਏ ਨਹਿਰ ਵਿੱਚ ਡਿੱਗ ਕੇ ਡੁੱਬ ਗਏ।