ਲੁਧਿਆਣਾ ’ਚ ਸੁਨਿਆਰੇ ਦੀ ਦੁਕਾਨ ’ਤੇ ਲੁੱਟ/ ਨਾਟਕੀ ਢੰਗ ਨਾਲ ਬਰੇਸਲੇਟ ਲੈ ਕੇ ਫਰਾਰ/ ਘਟਨਾ ਸੀਸੀਟੀਵੀ ’ਚ ਕੈਦ, ਪੁਲਿਸ ਕਰ ਰਹੀ ਜਾਂਚ

ਲੁਧਿਆਣਾ ਦੇ ਸ਼ਿਮਲਾਪੁਰੀ ਦੇ ਮੁਹੱਲਾ ਕੋਟ ਮੰਗਲ ਵਿਖੇ ਇਕ ਨੌਸਰਬਾਜ਼ ਵੱਲੋਂ ਨਾਟਕੀ ਢੰਗ ਨਾਲ ਲੁੱਟ ਦੀ ਵਾਰਦਾਤ ਨੂੰ ਅੰਜਾਮ ਦਿੱਤਾ ਗਿਆ ਹੈ। ਨੌਸਰਬਾਜ਼ ਨਾ ਸਿਰਫ਼ ਚਾਂਦੀ ਦੇ ਬਰੇਸਲੇਟ ਚੋਰੀ ਕੀਤੇ ਬਲਕਿ ਦੁਕਾਨਦਾਰ ਨੂੰ 500 ਮੀਟਰ ਤੱਕ ਮੋਟਰ ਸਾਇਕਲ ਪਿੱਛੇ ਘਸੀਟਦਾ ਹੋਇਆ ਲੈ ਗਿਆ, ਜਿਸ ਨਾਲ ਦੁਕਾਨਦਾਰ ਨੂੰ ਗੰਭੀਰ ਜ਼ਖਮੀ ਹੋ ਗਿਆ। ਦੁਕਾਨਦਾਰ ਦੇ ਦੱਸਣ ਮੁਤਾਬਕ ਇਕ ਨੌਜਵਾਨ ਚਾਂਦੀ ਦਾ ਕੜਾ ਵੇਖਣ ਬਹਾਨੇ ਆਇਆ ਸੀ ਤੇ ਕੁੱਝ ਸਮੇਂ ਬਾਅਦ ਮੋਬਾਈਲ ਤੇ ਫੋਨ ਸੁਣਨ ਦਾ ਬਹਾਨਾ ਬਣਾ ਕੇ ਬਾਹਰ ਖੜ੍ਹੇ ਆਪਣੇ ਮੋਟਰ ਸਾਇਕਲ ਤੇ ਭੱਜ ਗਿਆ। ਉਸ ਨੇ ਫੜਣ ਦੀ ਕੋਸ਼ਿਸ਼ ਕੀਤੀ ਪਰ ਉਹ ਭੱਜਣ ਵਿਚ ਸਫਲ ਰਿਹਾ। ਪੁਲਿਸ ਨੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।

ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਪੀੜਤ ਜਵੈਲਰ ਮਨੋਜ ਨੇ ਦੱਸਿਆ ਕਿ ਇੱਕ ਨੌਜਵਾਨ 32 ਗ੍ਰਾਮ ਚਾਂਦੀ ਦਾ ਕੜਾ ਦੇਖਣ ਦੇ ਬਹਾਨੇ ਉਸਦੀ ਦੁਕਾਨ ‘ਤੇ ਆਇਆ ਸੀ। ਮਨੋਜ ਨੇ ਉਸਨੂੰ ਦੋ ਵੱਖ-ਵੱਖ ਬਰੇਸਲੇਟ ਦਿਖਾਏ। ਲਗਭਗ 5 ਤੋਂ 8 ਮਿੰਟ ਦੁਕਾਨ ਵਿੱਚ ਰਹਿਣ ਤੋਂ ਬਾਅਦ, ਧੋਖੇਬਾਜ਼ ਨੇ ਫ਼ੋਨ ਉਸਦੇ ਕੰਨ ਨਾਲ ਲਗਾਇਆ ਅਤੇ ਗੱਲ ਕਰਨ ਦਾ ਬਹਾਨਾ ਕਰਕੇ ਅਚਾਨਕ ਦੁਕਾਨ ਤੋਂ ਬਾਹਰ ਭੱਜ ਗਿਆ।

ਉਸ ਨੇ ਆਪਣੀ ਮੋਟਰਸਾਈਕਲ ਦੁਕਾਨ ਦੇ ਬਾਹਰ ਖੜ੍ਹੀ ਕੀਤੀ ਸੀ, ਜਿਵੇਂ ਹੀ ਉਸਨੇ ਮੋਟਰਸਾਈਕਲ ਸਟਾਰਟ ਕਰ ਕੇ ਉੱਤੇ ਚੜ੍ਹਨ ਦੀ ਕੋਸ਼ਿਸ਼ ਕੀਤੀ, ਮਨੋਜ ਪਿੱਛੇ ਤੋਂ ਭੱਜ ਕੇ ਉਸਨੂੰ ਫੜ ਲਿਆ ਪਰ ਉਸ ਨੇ ਰੁਕਣ ਦੀ ਬਜਾਏ ਮੋਟਰਸਾਈਕਲ ਭਜਾ ਲਿਆ, ਜਿਸ ਕਾਰਨ ਉਹ ਉਸ ਨੂੰ ਸੜਕ ‘ਤੇ 500 ਮੀਟਰ ਤੋਂ ਵੱਧ ਘਸੀਟਦਾ ਹੋਇਆ ਲੈ ਗਿਆ। ਘਟਨਾ ਤੋਂ ਬਾਅਦ ਮੌਕੇ ਤੇ ਪਹੁੰਚੀ ਡਿਵੀਜ਼ਨ ਨੰਬਰ 6 ਦੀ ਪੁਲਿਸ ਨੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਇਲਾਕੇ ਦੇ ਸੀਸੀਟੀਵੀ ਫੁਟੇਜ ਦੀ ਜਾਂਚ ਕੀਤੀ ਜਾ ਰਹੀ ਹੈ। ਪੁਲਿਸ ਅਧਿਕਾਰੀ ਦਾ ਕਹਿਣਾ ਹੈ ਕਿ ਦੋਸ਼ੀ ਦੀ ਪਛਾਣ ਕੀਤੀ ਜਾ ਰਹੀ ਹੈ ਅਤੇ ਜਲਦੀ ਹੀ ਮੁਲਜਮ ਨੂੰ ਕਾਬੂ ਕਰ ਲਿਆ ਜਾਵੇਗਾ।