ਅੰਮ੍ਰਿਤਸਰ ਵਿਖੇ ਹੋਲਿਕਾ ਦਹਨ ਮੌਕੇ ਸਮਾਗਮ/ ਸਾਬਕਾ ਚੇਅਰਮੈਨ ਦਿਨੇਸ਼ ਬੱਸਸੀ ਨੇ ਕੀਤੀ ਸ਼ਿਰਕਤ/ ਇਲਾਕਾ ਵਾਸੀਆਂ ਨਾਲ ਸਾਂਝਾ ਕੀਤੀਆਂ ਖੁਸ਼ੀਆਂ

ਇੰਪਰੂਵਮੈਂਟ ਟਰੱਸਟ ਦੇ ਸਾਬਕਾ ਚੇਅਰਮੈਨ ਦਿਨੇਸ਼ ਬੱਸਸੀ ਨੇ ਅੱਜ ਹੋਲਿਕਾ ਦਹਨ ਦੇ ਮੌਕੇ ’ਤੇ ਇਲਾਕਾ ਵਾਸੀਆਂ ਨਾਲ ਮਿਲ ਕੇ ਤਿਉਹਾਰ ਦੀਆਂ ਖੁਸ਼ੀਆਂ ਸਾਂਝੀਆਂ ਕੀਤੀਆਂ। ਵਾਰਡ ਨੰਬਰ 33 ਦੀ ਕੈਨਾਲ ਕਾਲੋਨੀ ਵਿੱਚ ਸਮਾਜ ਸੇਵੀ ਨੀਲਮ ਕਾਂਡਾ ਅਤੇ ਬਲਦੇਵ ਕਾਂਡਾ ਵੱਲੋਂ ਕਰਵਾਏ ਗਏ ਸਮਾਰੋਹ ਵਿੱਚ ਦਿਨੇਸ਼ ਬੱਸਸੀ ਮੁੱਖ ਮਹਿਮਾਨ ਵਜੋਂ ਸ਼ਾਮਲ ਹੋਏ। ਇਸ ਮੌਕੇ ਵੱਡੀ ਗਿਣਤੀ ਵਿੱਚ ਪਹੁੰਚੇ ਬਜ਼ੁਰਗਾਂ, ਨੌਜਵਾਨਾਂ ਅਤੇ ਮਹਿਲਾਵਾਂ ਨੇ ਭਗਤੀ ਭਾਵ ਨਾਲ ਅਧਰਮ ਉੱਤੇ ਧਰਮ ਦੀ ਜਿੱਤ ਦਾ ਤਿਉਹਾਰ ਮਨਾਇਆ।

ਜਨ ਸਮੂਹ ਨੂੰ ਸੰਬੋਧਨ ਕਰਦੇ ਹੋਏ ਦਿਨੇਸ਼ ਬੱਸਸੀ ਨੇ ਕਿਹਾ ਕਿ ਹੋਲਿਕਾ ਦਹਨ ਸਿਰਫ਼ ਇੱਕ ਰਸਮ ਨਹੀਂ, ਸਗੋਂ ਸਾਡੇ ਅੰਦਰਲੇ ਅਹੰਕਾਰ ਅਤੇ ਸਮਾਜ ਦੀਆਂ ਬੁਰਾਈਆਂ ਨੂੰ ਭਸਮ ਕਰਨ ਦਾ ਦਿਨ ਹੈ। ਇਤਿਹਾਸ ਗਵਾਹ ਹੈ ਕਿ ਹਿਰਣਿਆਕਸ਼ਿਪੁ ਵਰਗਾ ਅਹੰਕਾਰ ਕਦੇ ਟਿਕ ਨਹੀਂ ਸਕਦਾ। ਭਗਤ ਪ੍ਰਹਲਾਦ ਦੀ ਜਿੱਤ ਸਾਨੂੰ ਸਿਖਾਉਂਦੀ ਹੈ ਕਿ ਜਿਸਦੇ ਕੋਲ ਸੱਚ ਅਤੇ ਵਿਸ਼ਵਾਸ ਹੁੰਦਾ ਹੈ, ਉਸਦਾ ਕੋਈ ਵਾਲ ਵੀ ਵਾਂਕਾ ਨਹੀਂ ਕਰ ਸਕਦਾ।

ਉਨ੍ਹਾਂ ਨੇ ਭਾਵੁਕ ਹੁੰਦੇ ਹੋਏ ਕਿਹਾ, “ਰਾਜਨੀਤੀ ਅਤੇ ਸਮਾਜ ਸੇਵਾ ਵਿੱਚ ਮੇਰਾ ਮੰਨਣਾ ਹੈ ਕਿ ਸੱਚਾਈ ਦਾ ਰਾਹ ਔਖਾ ਹੋ ਸਕਦਾ ਹੈ, ਪਰ ਜਿੱਤ ਹਮੇਸ਼ਾਂ ਉਸਦੀ ਹੁੰਦੀ ਹੈ ਜੋ ਸੱਚ ਦਾ ਸਾਥ ਦਿੰਦਾ ਹੈ। ਅੱਜ ਮੇਰੇ ਕਰਮਾਂ ਦਾ ਫਲ ਮੈਨੂੰ ਇਲਾਕੇ ਦੇ ਲੋਕਾਂ ਦੇ ਇਸ ਬੇਅੰਤ ਪਿਆਰ ਦੇ ਰੂਪ ਵਿੱਚ ਮਿਲ ਰਿਹਾ ਹੈ। ਇਹ ਇਲਾਕਾ ਵਾਸੀ ਮੇਰਾ ਪਰਿਵਾਰ ਹਨ ਅਤੇ ਮੈਂ ਕਦੇ ਵੀ ਉਨ੍ਹਾਂ ਨੂੰ ਆਪਣੇ ਤੋਂ ਵੱਖਰਾ ਨਹੀਂ ਸਮਝਿਆ।

ਬੱਸਸੀ ਨੇ ਅਪੀਲ ਕੀਤੀ ਕਿ ਇਸ ਪਵਿੱਤਰ ਅੱਗ ਦੇ ਸਾਹਮਣੇ ਅਸੀਂ ਆਪਣੇ ਸ਼ਹਿਰ ਵਿੱਚੋਂ ਨਸ਼ਿਆਂ ਦੀ ਬੁਰਾਈ, ਬੇਰੁਜ਼ਗਾਰੀ ਅਤੇ ਆਪਸੀ ਭੇਦਭਾਵ ਵਰਗੀ ‘ਹੋਲਿਕਾ’ ਨੂੰ ਸਾੜ ਕੇ ਰਾਖ ਕਰਨ ਦਾ ਸੰਕਲਪ ਲਈਏ। ਉਨ੍ਹਾਂ ਨੇ ਕਿਹਾ ਕਿ ਜਿਵੇਂ ਲੱਕੜੀਆਂ ਇਕੱਠੀਆਂ ਹੋ ਕੇ ਵੱਡੀ ਮਸ਼ਾਲ ਬਣਦੀਆਂ ਹਨ, ਓਸੇ ਤਰ੍ਹਾਂ ਜੇ ਅਸੀਂ ਇਕਜੁੱਟ ਹੋ ਜਾਈਏ ਤਾਂ ਇਲਾਕੇ ਦੀ ਹਰ ਸਮੱਸਿਆ ਦਾ ਹੱਲ ਸੰਭਵ ਹੈ।

ਇਸ ਸਮਾਗਮ ਨੂੰ ਸਫਲ ਬਣਾਉਣ ਲਈ ਨੀਲਮ ਕਾਂਡਾ ਦੀ ਕੜੀ ਮਿਹਨਤ ਦੀ ਸਰਾਹਨਾ ਕੀਤੀ ਗਈ। ਮੌਕੇ ’ਤੇ ਵੰਸ਼ ਬੱਸਸੀ, ਹਰਜੀਤ ਸਿੰਘ ਠੇਕੇਦਾਰ, ਰਾਣਾ ਰੱਖੜਾ, ਰਾਜਬੀਰ ਰਾਜੂ, ਸੰਦੀਪ ਸ਼ਾਹ, ਲੱਕੀ ਰਾਜਪੂਤ, ਬਿੱਟੂ ਇੰਦਿਰਾ, ਜੋਰਾਵਰ ਸਿੰਘ, ਯੁਵਰਾਜ ਮਜੀਠੀਆ ਸਮੇਤ ਕਈ ਪ੍ਰਮੁੱਖ ਸ਼ਖ਼ਸੀਅਤਾਂ ਹਾਜ਼ਰ ਸਨ।