ਸੰਗਰੂਰ ’ਚ ਕਿਸਾਨਾਂ ਵੱਲੋਂ ਇੰਸਪੈਕਟਰ ਦਾ ਘਿਰਾਓ; ਬੋਲੀ ਕਰਵਾਉਣ ’ਚ ਆਨਾਕਾਨੀ ਦੇ ਇਲਜ਼ਾਮ

ਸੰਗਰੂਰ ਦੇ ਪਿੰਡ ਕਿਲ੍ਹਾ ਭਰੀਆਂ ਦੀ ਅਨਾਜ ਮੰਡੀ ਅੱਜ ਵੇਲੇ ਕਿਸਾਨਾਂ ਦੇ ਰੋਸ ਦਾ ਕੇਂਦਰ ਬਣ ਗਈ ਜਦੋਂ ਝੋਨੇ ਦੀ ਬੋਲੀ ਵਿਚ ਦੇਰੀ ਤੋਂ ਨਾਰਾਜ ਕਿਸਾਨਾਂ ਨੇ ਮੰਡੀ ਬੋਰਡ ਦੇ ਇੰਸਪੈਕਟਰ ਦਾ ਘਿਰਾਓ ਕਰ ਦਿੱਤਾ।  ਕਿਸਾਨਾਂ ਦਾ ਕਹਿਣਾ ਹੈ ਕਿ ਇੰਸਪੈਕਟਰ ਜਾਣ-ਬੁੱਝ ਕੇ ਬੋਲੀ ਨਹੀਂ ਲਗਾ ਰਿਹਾ। ਕਿਸਾਨਾਂ ਨੇ ਇੰਸਪੈਕਟਰ ਨੂੰ ਤਕਰੀਬਨ ਦੋ ਘੰਟਿਆਂ ਤੱਕ ਮੰਡੀ ਵਿੱਚ ਹੀ ਬੈਠਾ ਕੇ ਰੱਖਿਆ ਗਿਆ।

ਮੰਡੀ ਪ੍ਰਬੰਧਕਾਂ ਵਿਰੁੱਧ ਨਾਅਰੇਬਾਜ਼ੀ ਕਰ ਰਹੇ ਕਿਸਾਨਾਂ ਨੇ ਕਿਹਾ ਕਿ ਮਿਹਨਤ ਨਾਲ ਤਿਆਰ ਕੀਤੀ ਝੋਨੇ ਦੀ ਫਸਲ ਮੰਡੀ ਵਿੱਚ ਪਈ ਸੜ ਰਹੀ ਹੈ, ਪਰ ਬੋਰਡ ਅਧਿਕਾਰੀ ਸਮੇਂ ‘ਤੇ ਬੋਲੀ ਨਹੀਂ ਲਗਾ ਰਹੇ। ਕਿਸਾਨਾਂ ਨੇ ਚੇਤਾਵਨੀ ਦਿੱਤੀ ਕਿ ਜੇਕਰ ਤੁਰੰਤ ਖਰੀਦ ਪ੍ਰਕਿਰਿਆ ਸ਼ੁਰੂ ਨਾ ਕੀਤੀ ਗਈ, ਤਾਂ ਵੱਡੇ ਪੱਧਰ ‘ਤੇ ਪ੍ਰਦਰਸ਼ਨ ਕੀਤਾ ਜਾਵੇਗਾ।

ਕਿਸਾਨ ਜਥੇਬੰਦੀਆਂ ਦਾ ਕਹਿਣਾ ਹੈ ਕਿ ਸਰਕਾਰ ਵੱਲੋਂ ਝੋਨੇ ਦੀ ਖਰੀਦ ਸਮੇਂ ‘ਤੇ ਨਾ ਹੋਣ ਕਾਰਨ ਕਿਸਾਨਾਂ ਨੂੰ ਵੱਡੇ ਆਰਥਿਕ ਨੁਕਸਾਨ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਉਨ੍ਹਾਂ ਮੰਗ ਕੀਤੀ ਹੈ ਕਿ ਇੰਸਪੈਕਟਰ ਖ਼ਿਲਾਫ਼ ਕਾਰਵਾਈ ਕੀਤੀ ਜਾਵੇ ਅਤੇ ਮੰਡੀ ਵਿੱਚ ਤੁਰੰਤ ਬੋਲੀ ਲਗਾ ਕੇ ਫਸਲ ਦੀ ਖਰੀਦ ਯਕੀਨੀ ਬਣਾਈ ਜਾਵੇ। ਕਿਲ੍ਹਾ ਭਰੀਆਂ ਦੀ ਇਹ ਘਟਨਾ ਸੂਬੇ ਦੀਆਂ ਅਨਾਜ ਮੰਡੀਆਂ ਵਿੱਚ ਚੱਲ ਰਹੀਆਂ ਸਮੱਸਿਆਵਾਂ ਨੂੰ ਇੱਕ ਵਾਰ ਫਿਰ ਉਜਾਗਰ ਕਰ ਰਹੀ ਹੈ, ਜਿੱਥੇ ਕਿਸਾਨ ਅਜੇ ਵੀ ਆਪਣੀ ਫਸਲ ਵੇਚਣ ਲਈ ਲਾਈਨਾਂ ਵਿੱਚ ਖੜੇ ਹਨ। ਕਿਸਾਨਾਂ ਨੇ ਝੋਨੇ ਦੀ ਨਿਰਵਿਘਣ ਬੋਲੀ ਕਰਵਾਉਣ ਦੀ ਮੰਗ ਕੀਤੀ ਐ।