ਕਠੂਆ ਰੇਲਵੇ ਪੁਲਿਸ ਵੱਲੋਂ ਨਕਲੀ ਟੀਟੀ ਕਾਬੂ/ ਲੋਕਾਂ ਤੋਂ ਨਕਲੀ ਟੀਟੀ ਬਣ ਕੇ ਠੱਗਦਾ ਸੀ ਪੈਸੇ/ ਪੁਲਿਸ ਨੇ ਮਾਮਲਾ ਦਰਜ ਕਰ ਕੇ ਜਾਂਚ ਕੀਤੀ ਸ਼ੁਰੂ

ਰੇਲਵੇ ਦੇ ਟਿਕਟ ਚੈਕਿੰਗ ਸਟਾਫ ਨੇ ਇਕ ਅਜਿਹੇ ਸਖਸ਼ ਨੂੰ ਗ੍ਰਿਫਤਾਰ ਕੀਤਾ ਹੈ ਜੋ ਲੋਕਾਂ ਨੂੰ ਨਕਲੀ ਟੀਟੀ ਬਣ ਕੇ ਪੈਸੇ ਬਟੋਰਨ ਦਾ ਕੰਮ ਕਰਦਾ ਸੀ। ਜਾਣਕਾਰੀ ਅਨੁਸਾਰ ਚੈਕਿੰਗ ਸਟਾਫ ਦੇ ਸੇਖਰ ਕੁਮਾਰ ਵੱਲੋਂ ਸ਼ੱਕੀ ਵਿਅਕਤੀ ਤੋਂ ਪੁਛਗਿੱਛ ਕੀਤੀ ਤਾਂ ਉਹ ਤਸੱਲੀਬਖਸ਼ ਜਵਾਬ ਨਹੀਂ ਦੇ ਸਕਿਆ। ਚੈਕਿੰਗ ਸਟਾਫ ਦੇ ਦੱਸਣ ਮੁਤਾਬਕ ਮੁਲਜਮ ਕੋਲੋਂ ਮਿਲੇ ਪਛਾਣ ਪੱਤਰ ਵੀ ਫਰਜੀ ਪਾਏ ਗਏ ਹਨ। ਰੇਲਵੇ ਸਟਾਫ ਨੇ ਮੁਲਜਮ ਨੂੰ ਫੜ ਕੇ ਪੁਲਿਸ ਹਵਾਲੇ ਕਰ ਦਿੱਤਾ ਹੈ। ਪੁਲਿਸ ਨੇ ਅਗਲੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।

ਘਟਨਾ ਸੋਮਵਾਰ ਨੂੰ ਜੰਮੂ ਅਤੇ ਕਠੂਆ ਵਿਚਕਾਰ ਰੁਟੀਨ ਟਿਕਟ ਚੈਕਿੰਗ ਦੌਰਾਨ ਵਾਪਰੀ। ਜੰਮੂ ਅਤੇ ਕਠੂਆ ਵਿਚਕਾਰ ਟ੍ਰੇਨ ਨੰਬਰ 12476 ‘ਤੇ ਚੈਕਿੰਗ ਕਰਦੇ ਸਮੇਂ, ਜੰਮੂ ਸਟੇਸ਼ਨ ‘ਤੇ ਟਿਕਟ ਚੈਕਿੰਗ ਸਟਾਫ ਸ਼ੇਖਰ ਕੁਮਾਰ ਨੇ ਇੱਕ ਸ਼ੱਕੀ ਵਿਅਕਤੀ ਨੂੰ ਦੇਖਿਆ, ਜੋ ਪੂਰੀ ਟਿਕਟ ਚੈਕਿੰਗ ਵਰਦੀ ਵਿੱਚ ਸੀ, ਟਿਕਟਾਂ ਦੀ ਜਾਂਚ ਕਰ ਰਿਹਾ ਸੀ। ਸ਼ੇਖਰ ਕੁਮਾਰ ਨੇ ਸ਼ੱਕੀ ਵਿਅਕਤੀ ਤੋਂ ਪੁੱਛਗਿੱਛ ਕੀਤੀ, ਪਰ ਉਹ ਤਸੱਲੀਬਖਸ਼ ਜਵਾਬ ਦੇਣ ਵਿੱਚ ਅਸਮਰੱਥ ਰਿਹਾ।

ਹੋਰ ਜਾਂਚ ਕਰਨ ‘ਤੇ, ਟਿਕਟ ਚੈਕਿੰਗ ਸਟਾਫ ਨੇ ਉਸਦਾ ਅਧਿਕਾਰਤ ਪਛਾਣ ਪੱਤਰ ਜਾਅਲੀ ਪਾਇਆ। ਅਗਲੀ ਕਾਰਵਾਈ ਤੋਂ ਬਾਅਦ, ਟਿਕਟ ਚੈਕਿੰਗ ਸਟਾਫ ਨੇ ਜਾਅਲੀ ਟਿਕਟ ਚੈਕਰ ਨੂੰ ਕਠੂਆ ਜੀਆਰਪੀ ਦੇ ਹਵਾਲੇ ਕਰ ਦਿੱਤਾ। ਜੀਆਰਪੀ ਨੇ ਮਾਮਲਾ ਦਰਜ ਕਰ ਲਿਆ ਹੈ ਅਤੇ ਮੁਲਜ਼ਮਾਂ ਤੋਂ ਬਰਾਮਦ ਕੀਤੇ ਜਾਅਲੀ ਦਸਤਾਵੇਜ਼ਾਂ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।

ਸੀਨੀਅਰ ਡਿਵੀਜ਼ਨਲ ਕਮਰਸ਼ੀਅਲ ਮੈਨੇਜਰ, ਉਚਿਤ ਸਿੰਘਲ ਨੇ ਸਟਾਫ ਦੀ ਉਨ੍ਹਾਂ ਦੀ ਚੌਕਸੀ ਲਈ ਪ੍ਰਸ਼ੰਸਾ ਕਰਦਿਆਂ ਯਾਤਰੀਆਂ ਨੂੰ ਹਮੇਸ਼ਾ ਵੈਧ ਟਿਕਟਾਂ ਨਾਲ ਯਾਤਰਾ ਕਰਨ ਦੀ ਅਪੀਲ ਕੀਤੀ ਅਤੇ ਜੇਕਰ ਕੋਈ ਸ਼ੱਕੀ ਵਿਅਕਤੀ ਉਨ੍ਹਾਂ ਦੀਆਂ ਟਿਕਟਾਂ ਦੀ ਜਾਂਚ ਕਰਦਾ ਹੈ ਜਾਂ ਜੁਰਮਾਨੇ ਦੀ ਮੰਗ ਕਰਦਾ ਹੈ ਤਾਂ ਤੁਰੰਤ ਸਰਕਾਰੀ ਸਟਾਫ ਜਾਂ ਰੇਲਵੇ ਹੈਲਪਲਾਈਨ ਨੰਬਰ 139 ਨੂੰ ਸੂਚਿਤ ਕਰਨ ਤਾਂ ਜੋ ਅਜਿਹੇ ਅਨਸਰਾਂ ਖਿਲਾਫ ਨਕੇਲ ਕੱਸੀ ਜਾ ਸਕੇ।